la puesia pusè bela

 

                                                                      

la puesia pusé bela la ta guarda denn e la dis cusa ghe denn

la puesia pusé bela la sa scrìi da par lé

la puesia pusè bela a l'é stragiàa

la puesia pusé bela l'é no bela  ma l'é 'na puesia

la ta tuca i cordi dul coeur

la ta fa piangi da denn la ta fàa quasi mal

la puesia pusé bela la scrivarò mai

la pensu

sensa virgul e sensa smagì sensa culur

la puesia pusé bela la sa scrìi nò

la sa pensa cun ogi da fioeu

tutu l'é noeu tutu l'é bel

la cusina

                                                                        

sul vedar da la finestra in cusina ghe restà i segnn di guti suga

visin a la stua sa sta ben

ul postu mei al mundu l'é la me cusina

un bel taul da massel e ses cadreghi impaià

ul furnell cun la bumbula

ul lavandin cun l'acqua curenti

la stua da ghisa cun i serci la caldereta e un furnu grandi

da fa i turti e i lasagnn e da meti den i pée da sculdà e da fa vignì i gelun

un bufé cun ul pan dù o tri pomm

la sàa e ul sucar 'nà butiglia cul vin

dù tri cò d'ai e un para da scigull

sa ta voeuri da poeu

ricordi cunfus

 

                                                                       

la sira la purtea memori da tempi sensa ricordi

penser ca scapea

ca fean tempu nò a vignì foeura

riesìi nò a capì se ian bei o bruti

da person o nimai
estàa o invernu

robi ca sean svilupàa nò

ca pudean vess sta

'na vita vivù nò

fra 'l taul e 'l divan

 

                                                                             

eu mai fa ul cuntu da la distansa fra l taul e 'l divan

ma rendu cuntu quan rivu al divan

e te guardi ul taul cume sa la fuss la Luna

ma ricordu cà salteu i rungi pà 'l lungu

dess la mé càa lé

'na muntagna da scalàa

brutt e bun

                                                                      

impastà :80  gr.  da  biscoti    sbriciulàa, 80  gr.  da  farina   bianca,  120  gr. da  sucher, 25  gr.  da  buter,  8  gr.  da  canela  in pulver, un  oeu intregh   e  un  russ,   60  gr.  da mandurl  triàa  gross,  60  gr.  da  naranzu  candìi  tria  fin.  Furma  dù  bastunit,  infarinai  e fai  coeus  'n  dul  furno  a  200 g.  fin cà  diventan  biund  scur.   Taiai  da traversu  quan  chin  tiepid, altesa  un  cm.



Tre  quater  butigli  da  Moscato  Cascina  Fonda, cumpagnerann  benissim

acqua morta

                                                

L'acqua l'ea morta in dul gir dul Marinun

 la parea morta

un fil d'erba al girea 'n dul mulinell ca ghea in mesu

'n dul mulinell lisc gà girea 'l fil d'erba

'na Butatris coeurta e grosa la fea un gir largu

'na Sciura celesti la vulea da chi e da là

pian pianin distacu la cadena e cun la barca vò

pulaster a la caciadura

                                                                        

taia  el pulaster  a  tocc e  infarinai  meti  in 'na padela  con una  scigula  trità
quan  la  scigula  la ciapa  culur  tirala  foeura  e  metela  da part
fai  tustà  ben ben e  meti  den  mes  bicer  da  marsala  secc
giungi  'na  carotula e  un  gamb  da  selar  triàa
rimeti  la  scigula  e  du  tumatis  triàa  o una  salsa  slungàa cun l'acqua
meti  'l  querc  e  fa  coeus  minim  un'ura.





Una   butiglia  da  Suno  da  du  ann  a  testa l'é  se  da  fa  festa.