RIMBAUD

Leggendo  Simone  Meazza di  cui  godo (  immeritatamente )  la  amicizia  vengo a  sapere  che oggi è  il compleanno   di  Rimbaud.
Partecipo.

d'invernu  viagiarom  in un vagun  rosa  cunn i  cusiti  bloeu
sa  starà  ben
un grupu  da  basin  sa  scundan  in  tuti  i cantun
te  sararé  i ogi  pà vidé  nò  i  umbar  da  la  sira  pìin da  Demoni
poeu  ta  sentiré  un    basin  sfiurà  la  facia  e  sul  coll
cercal 
ta  ma  disaré 
ma  ga  vooeur  trop  tempu  pàr  trual
...al  coeur  sensa  fermas...


Arthur  Rimbaud

un sognn

                                                                          

indurmentas cume 'n dà 'na tana

perdas in dul sognn cume in dun bel libar

sognn culuràa cume un Pavun

un arcubalen fantastic

cuciàa giò me na Gaina

sum poeu mì som un Can ca 'l solta i càa

e quan ca parlu tasan tuci

la curti l'é tuta mia

mi som ul Can ul Caval la Vaca l'Asnin

son nò ul padrun a som lur

ma svegliu stragiàa me na Pula e spuù foeura ul mar ca sé vansàa

un poeur Diaul bun nò da sugnà

pulaster in fricassea

                                                                           

infarina i  tocc  dul  pulaster e faghi   ciapà  culur  in dul  buter e  mesa  scigula,  quan  che  ti  è  rusulàa mett  un  pù  da  broeudu  e  agiungi  broeudu
fin a  cutoeura.
sbatt    du  russ  d'oeu  cun ul  soeugu  d'un limun    aggiungi al  pulaster e  fai adensà  sensa  buì.  Mett   ul cuerciu per un  des  minut per insapoeurì.




Una   butiglia  a  testa  da  Gattinara  da  tri  ann.

ul mé paes

Ul me paes.

                                                                

Dopu 50 ann ca som chi al cunsideru ul me paes. A lé cambia ma lé mo istess, secundu in due ca tal guardi. Quan som vignu chi a staa, guardandu da la me finestra sa videa tucc verdu fin due ca rivea la vista, adess sa vedi ca a vista d'occ. Suta la me finestra ga pasea la rungia da scaricu da la SACPA, la andea a scariga in di campagn, dopu la pesa a ghea pu' nien. Su la straa noueva, versu Cugion, 4 0 5 vileti e poeu pu' nien, tuta campagna.

Versu Castan, ben o mal, l'é resta istess, i ultam ca in sempar cuii.

Su la straa noeuva ghea l'Americana: ul centar dul paes. Vertu da la matina prestu a la sira tardi. Risturanti e Albergu, tabachè, biliardu. E 'na sala che la dumeniga basura, tusann e i giuan fean i prim filariti, e annca nò prim filariti. In facia, da là da la straa ghea la faturia, e sul lucal da cantun 'l Celestino al tignea i so anguri che 'l metea a bagn in una buta ca ga 'ndea dentu l'acqua da la funtanela, anguri cal vindea al bordu da la straa.

In cui tempi là sa 'ndea tucin a lauaa e in du l'Americana a ghea cuii ca iran cà in malatia

L'ea un postu da camiunisti ca 'ndea a ca vignea e sa firmean a mangià, ul piasal da là da la straa l'ea sempar pin da camiun, e la genti ca ian in gir par i so lauaa, sa firmean anca luoer a mangià. Ul misdì l'Americana a l'ea strapiina, la sala che la duminiga i balean, l'ea pina da taul e la saleta dopu ul biliardu, 'n dua sa giugea a carti, piina anca l'é. L 'Ivo in cusina an fea 'na pell.
Certi vueolti par toeu i sigareti ga vurea 10 minuti.

Che tempi ca ian !

Ghe cambià tucoss ! L'Americana la ghe pu' ma la genti la sa troeua istess

Ul paes lé cambia ma l'é sempar istess. Ca fa ul paes a l'e la genti. Genti gentil ma dura, educaa ma anca vilan, inteligenti ma ca sa ferman nu a rasunà, genti ca prima da pensà l'an già fai.

La mé genti, i mé amis

 

la stansa da la dispensa

                                                                     

Verta la porta la stansa la parea voeuia

ma dopu sa sintia udur da mufa di furmagg mitù a stagiunà

e di salam tacà su sui trav

i patati in di cesti iran tranquìi e casciean nò

do ass sul mur p'in da cachi e pomm

do butigli da oli da girasò

do butiglì da asé

'na fira da butigli da cunserva

Cua a la Vaccinara-lumbarda.

                                                                           

Fa  tustà,  da  fa  vignì   foeura  'l  saur, i tochi da Cua, rusula  ben  ben 
poeu  bagnal  cul  vin  bianc e fal  sugà,  mett  denn  una  brancàa  da  sufriitt e  fagh ciapàa  'l saur, quetal  da  acqua  cun  denn  un po'  da  salsa  e  da  sàa, poeu taia  denn  una  scigula  una  carotula e  5-6  gambi  da  selar.   Fall  cooeus,  a  fougu  bass  do- tre  ur.
Dificil   truà  la  cua.


Devan  nò  mancàa  i  butigli  da   vin, una  butiglia  a  testa  da  Vespulina  di  Culinn  Nuares   van  ben.

l'istrusiun

 

                                                                       

la matematica l'hu studiàa su i cinq dìi d'una man

l'italian sintendu i Priti parlàa

la maestra a scoeura la parlea in dialetu se nò capiun nò

u fa ul Ceraghetu imparandu ul Confiteor in latin ma seu nò cusa diseu

se 'na tusa la parlea in talian scapeu

ù studia suta al livell d'una semplis cumunicasiun