noci stelà

                                                                     

 

noci stelàa noci da Ustu

noci ca po' sucedi tucoss

e ga sucedi nienti

e ul vivi l'é no in di robi  ca sucedi

ma in quìi ca po' sucedi

noci da vita mischià ai sognn

ca cume l'aria vann e gh'in pù

la vita a lé vivi

sugnandu parchè sa te sogni te vivi

fil da seda

                                                                  

lungu i fil da seda da la mé pena

piangeu sensa speransa

l'incoeu l'ea un puntu fermu

'l duman tropu luntan

ecu parché hu ciapà ul coeu fra i man

par piangi

'ndemm insema

                                                                         

'ndemm insema

gà sarà 'na lunga salida un miliun da basìi

ogni basel 'nà lacrima e i robi vegnarann vigi

cun la tristesa in ogni usciada

vegnn

la sarà 'na vita innscì nò piata me tuti

la sarà la nosta vita

l'udur di mé vint'ann

                                                                       

ul prufum dul pan dul venerdì 'l piinia la cuntràa
e i roeui di careti su la risàa sa sintian da luntan

buondì sciura Ida buondì Giusepina

al sabu l'udur di castegnn cà sultean sul foeugu dul camin

l'udur di vachi in stala

da la rudera in fundu a la curti

dul fen sura la stala

l'udur da la bugada visin 'l scarigu in curti

l'udur di mé vint' ann

una campana

                                                                   

una campana la sona 'n la cuntràa voeuia

sunandu ga rimbumba ul voeui da la noci

i giuin sentan nò parchè dorman

i omm sa sentan bandunàa

e caminan sensa ricurdàa

sann ca deann caminàa

in nasù par caminàa

questu i sann

dìi cume un stampin

                                                                        

tuti i dìi ca da vignì a in pagin da scrìi

e podan nò ves tuti 'n istess

cupià vunn da quel'ol

la vita lé nò 'na fotocupiatrice

'na fabrica da pessi in serie ma

cun la Luna in ciel un fasuletu netu in sacogia scarpi bun

ma fa pagura nisun

ventu neghar

                                                                     

ghe rià un ventu negar cuma ul Lòo

ma no pà purtà via

'l porta nà ventada da Frican

vutemas cuma tanti ann fa

gom la stesa pell stess mangià

dormum insema vom a cacià

poeu num som andà luntan

a vidè le nee i besti feroci i besti Uman

'n dà la noci lunga e scura ghè rivà la paura

sensa videla la ma turmenta

la sentu 'n da la pancia

ma 'l ventu da la Rasun

al bufà via tuti i paur

cuma 'na ramasa ca la neta la curt

ricordi perdù

                                                                          

sa vivi da ricordi perdù

ca sa ries nò a ciapà

ca voeulan 'n dul buscu

il bei in bruti 'n vulà

mei iscì i ha pensu a vunn a vunn ma voeuru

secunda ul mumentu ca troeuvu

inscì i rimpianti hin meno amar

PIATTI DELLA MEMORIA

 
La  cua  da  me  nona

1 Kg  da  cua, dificil  da  truà  parchè  i macelar  fan  rià  un  quartu  da  bestia e  i  quarti  in sensa  cua.
Rusulala  ben  ben, bagnà  cul  vin  biancu  secu, aggiungi  mes  tubetu  da  salsa, o la  passaa e una  scigula, una carotula, 5-6  gambi  da  selar,  taià  tutt a  tuchiti.
Fa  coeus  2  ureti  a  foeugu  bass.



Una  butiglia  da  Mismirì   russ da  du  ann  al  servi  a  equilibrà  ul  tutu.

i sass dul Tisin

                                                                  

Sculta i sass dul Tisin quanti storìi

han girà ul mundu

sann di stori ca nanca imaginum

inn stàa den da la tera 'n du l'infernu da foeugu

sul fundu dul mar in mesu ai pess

su i muntagn incantàa da nee

rutulandu pian pian

ul tempu l'é nien

'n da la vita d'un sass ghé nò postu par noeun.

noci da Ustu

                                                                     

noci stelàa noci da Ustu

noci ca po' sucedi tucoss

noci  ca sucedi nienti

ul vivi l'é nò in di robi ca sucedi

ma 'n quel ca po' sucedi

noci da vita mischià ai sognn

ma come l'aria vann a ghin poeu

la vita l'é vivi sugnandu

parchè sugnandu a lé vivi

puesìi in libertà

 

                                                                             

i puesìì a ìn cansuneti che te canti fra ti e ti

ga fan mal a nisun

faarfai liger ca van i gir sensa savé i 'dua 'ndà

'n dua sa pogian i a sentan nò parchè sensa pes

i puesìì portann l'aria da la sira

ul vulà di rundin la lus di stell

ul ridi di fioeu

ul prufum dul magengu

la belesa dul nien

So cunsumà

                                                                  

forsi duman gà rivaràa un quivun

a purtà un fiur, 'na caresa un ricordu luntan

ma tropi duman hu gia vivu

pasàa cume fraschi in da la rungia

nà finestra la guarda foeura

ma ga vegnn den no 'l So ma ul fregiu

'l me So chel ca ma tuchea

lu già cunsumàa tutu

I disegn di rundin

                                                                             

 

Cume di pitur inpasì

i rundin disegnan i so ghirigori in ciel

qualsiasi ciel 'l và ben

ciel asur, ciel gris, negher, giald, verd, aranciun, rus.

Ogni ghirigoru 'na cansun ca la và in ciel.

un periudu esaltanti

                                                                        

 

una vacanza bela nò

al fea coldu come a cà

un paes piscinin da la Valanzasca in dua gh'ea nien

la roba pusé esaltanti l'è sta ul Festival de l'Unità in val d'Ossola

ma un periudu grandius

la me tusa l'ea piscinina e la Lucia la spetea ul secundu fioeu

a la sira sa fea discursi seri

ul periudu nostu l'é sta da bona prudoeusiun

hu fai la musica da “sumes sumes”

'nà musica ca par la prima voeulta la me piasùu

ul Nino l'ea dispunibil a sintì tutt i me bal

sa fea di bei caminadi fina a la geseta dul cimiteri da Cimamulera

vacansa bella nò

periudu favulus

una tuvaia

                                                                       

Ghé un postu in di mé ricordi cà l'é vivu al par ier

unn taul suta 'na pianta 'na tuaia a quadratin bianche e russ

ma manca i persun ca da tantu vedu nò

ma manca la so amicisia 'l sta insema

ma manca la tusa ca lé mo da rivàa

fò girà ul bicier su i quadratin giugu a dama su i quadratin

cuma in ciar ca   sa pissà le rivàa

cun i ogi negar ca fean belesa

tucàa la so man l'é sta 'na scarica eletrica

eu mai vistu di quadratin pussé bel

ul bicier l'ea piin da felicità