la belesa di parol

                                                                   

mai saù

nanca suspetà che i parol schiscià in di pagin di libar

sa pudea tirai foeura e daghi un'altra vita

i paroi in bei pà so cuntu ma te podi cambiaghi ul sensu

la stesa parola d'ìi in un altra manera la cambia culur e la diventa splendenti

nà fira da parol cumpagnàa ben la diventa 'na belissima curona

ca ta podi tacà su sun'na noci

cuma 'na stelada su 'na curti scura

su un dì da coldu

nà sira da nebia

a un omm da den da la so carni

supa da scigull

                                                                 

taià a feti sutil do scigull bianchi e fai coeus cun una feta da buter, quan ciapan culur slunghi cun l'acqua e fai coeus tantu e poeu pasi al setacc e mischi cun l'acqua che te a druà par bagnà la supa.

Ciapa 'l pan a dadin che te fa rusulàa su la piastra e metel a strati in di tasin, ogni stratu un cugiàa da oue straspasàa,un bel cugiàa da grana gratugiàa.

Finì i strati bagnal cul broeudu boeuient. o se la se preferis cul latt.

Una butiglia a testa da Ghemme da tri ann, e lé festa.

 

un dìi finìi

                                                                     

un dìi lentu

ca 'l sa trascina sensa tempu

poeu a la fin al sarà luminus e irripetibil

quandu 'l finis

e ta vegnn la voeuia da rivival

ma l'é 'n dai

in fira cun i ol dìi

ricordi nebius

                                                                  

sa vivi da ricordi nebius

da robi fa nò

da caresi mai dàa

da noci vivù nò

da amicisii mai da

da parol mai sintù

prucurà da la me stupidera

ma sa tornu indrée magarim l'è pegg

lasemala finìi inscì

dìi sensa speransa

                                                              

 'na vita grisa

un andàa sensa cuntu

savendu cuma l'ea ul duman

sensa speransi ma certessi

ca l'ea cuma 'n coeu

vignendu vegiu e basta

un altar dìi gris

gris spurcu d'uficina

un gris sensa speransa

definitivu

ca sa pudea nò cancelàa cul bagnn d'ul sabu basura

ansi ul bagnn l'ea 'na preparasiun a la setimana

al fea parti da la vita

ca giràa ma sa vurea l'ea 'na vita grisa

'nà vita tùta

pulaster a la Marengo

                                                                               

ciapa un pulaster  giuin e  fal  a  toc gross, fal  rusulàa  ben  ben in  30  g.  da  buter  e un  cugià  d'oli  d'uliva,  cundìs  cun  Sa  Pever e  'na  presa  da   Nus  muscàa. Rusulàa  che  inn  tira   foeura 'l  vunc  e  butà  den  'na un bel  cugià  da  farina  e un  bicer  de  vin  bianc,  un  cicin de  broeud  per  tiral  a cutura, cuertà e  a  foueg  bass
In ultim un  po'  da presemul  triàa, strissà   den mes  limun  e  servis.



Una  butiglia  da Barbaresco  a  testa, pa  fa  intort   a  nisun, da  quel  bun,
da  la  vigna  al  So.

fiuriti da sira

                                                                              

fiuriti ca ridi

prima da sira

in que l'ura ca lé dree muri

l'ura pìina da la giurnà

ca tut ch'el ca se dìi lé dré a sparì

ga resta l'incunsistensa da chel ca se dìi

la vita denn ul ridi di fioeu

tutt ul mundu lé den in dul ridi di fioeu

ridan parchè han piangiu

e mi su nò se piangi o ridi

Madona e Stria

                                                                       

  

ogni tan Madona ogni tan Stria

l'ea un vivi inscì bel e brutu insema

l'ea un bel vivi

ul bel l'ea pusé bel e ul brutu pusé brutu

hu vivù al masim

anca ul ricordu l'é pusé bel

un ricordu saurìi

e pensu da vè buta via nò la vita

murì de famm

                                                                   

murì l'è 'na bruta abitudin

e ga l'ann tuti ge ne no vun ca ga la nò

l'evulusiun sucial l'è 'na pirlada

ul Signur 'l ga da ves nò amis cun nun

al dis cà 'l ma voeur ben ma dopu parol ga voeur i fati

murì intan ca te dormi fan tuti la firma

ma murì da famm l'è dura.

culur viola

                                                                         

Guarda guarda che arcubalen

dopu ul tempural prima dul seren

'n dul paesagiu ta par,

da ves den

cercandu ul me culur ma sentu ben

la bula da fantasia regalàa

lé un bel regal lasa stàa

sa dumà riesi a rivàa

in dua al partis da tera

pà'ndà su sul mé culur ul viola

MA PIAS VES SCHERSA'

                                                                      

Ma pias ves schersà

da genti superiur genti studiàa

ca ridi pà na parola sbagliàa

ridan da mi dul mé parlàa

intan ca studiean mi 'ndeu a lauràa

ognun 'l so imparàa

i tusann giuin

                                                                            

 

Giuina mé l'ai

cun quel udur da sauneta  e  ascei

da miceta sarà sù

'na candira mò da pisà

ul mundu l'ea tò

ma e te 'l sei nò

la fiama la và

la candira la sa cunsuma

il mundun ca l'ea to ca te ghei in man lé dislinguàa

te se diventà mama sensa sael

d'una tuseta prunta a ciapà in man ul mundu cuma ti

ul mundu l'é di tusann

ma i tusann duran pocu

la straa vegia

                                                                           

Te vé su la straa vegia

mila pass l'han segnàa

le drée vignì sira e ga vegn foeura i stell incantaa

te fe i pass ca te imparaa

guardu ul ciel come i marinar

la straa lé questa fra pocu semm rivaa

guarda nò indree urmai le pasàa

l'é sta dura ma insema gam l'om fa

demm inansi ciciota urmai lé pasàa

l'ultam tocu fal da partì che mi somm rivàa

la straa di murun

                                                                         

La stràa di murun

l'é pina da boeuscar e ragn russ

la rusàa su i sancarliti la dura pocu el So la suga

una bisa la coeur in mesu a l'erba cun in buca un soltamartin

pìin da niscoeur la sces al bordu dul buscu

e da mor e spin i ruvedi

su i pianti e la so umbria la tristesa la vegnn via

i Zizurlìliti iluminan ul buscu fra i pianti volti rampegan su

un ragiu da so mandàa giò in mesu ai foeui

me 'na caresa tuta da lus

cume un libar mò da legi guardu curius i pagin mitù in fira

vedu nò ul titul

ma quel l'è dentu da mi.

Pater noster

                                                                 

Pater noster ca te se in ciel

speru ca ti te ste ben

num son chi me i furmighi

ca ma scanum fra da noeun

puariti ga né tanti

miliardi e miliardi

ma sta tranquil da sciuri ga né pochi

da la cruna ga pasa nisun

da Manna ga né minga

i pan e i pesa 'n se da fa 'na merenda in dù o tri

Pater a mi te podi dil

te se da destra?

Pa chi te voti ?

Tira via la man ca te mitù sul cò da Renzi

l'é nò Mosé

vervi i acqui e, quandu in den tuti sari su

tò mai circà nien l'é la prima picula roba ca ta cercu

Pater nostu guarda giò.

'n demm insema

                                                                      

Vegnum a dree

femm la stesa stràa

un milun da basìi e som rivàa

pogias a mi

pogias ti a mi

vutemas

un pràa

                                                                             

'n dul verdu dul pràa

cun l'erba volta da taià

cun l'uselin ca 'l sutea cantà

cun la murusa ca la voeurea in da a càa

ul verdu l'ea pin da culur

d'ul magengu 'l ghea l'udur

di to basiti l ghea 'l saur

da la to miceta l'udur

ricordi dun tempu ca fù

un tempu luntan ca 'l torna pù

le le vegia la sa ricorda pù

fus da turnà ul praa l ghe pù

la noci la dà speransa

                                                                       

 

 

Da noci sa spera

certi robi sa roban dumà da noci

un minutu rubàa sui scar

un basin rubàa

spetàa ca sa pisa ul ciar induinàa i muvimenti 'n da la stansa

tirà matina cun i speransi

cun nien

dul dìi sa laura da noci sa pensa

e sa spera.