vita straca

                                                               

incoeu 'l café 'l ga nò 'l prufum

ul sucar al sa da nien

la curti l'é grisa sensa culur

i Gain van inansi a murmurà

'l Can 'l dormi in mesu a la curti

i Piun piunan suta ai cupi

la vita

straca la va

ul camin

                                                                   

ricurdandu l'udur di castegnn te se vedi in tanti in gir al camin

parlandu da nien

'na banca da donn vigi

e v'una da tusann sitàa in brascia a dòo a dòo

i fioeu setàa in tera guardean i tusann

i guss sa butean sul foeugu

cul tuscan in buca i Regiù guardean da padrun

cunili bagnàa

                                                                     

ù acetà ul silensi e ma sum truàa piin da parol

penser stragiàa cà risiean

incrusciàa in dun cantun 'n deu in gir sensa parlàa

parlàa da le me imaginasiun

come un cunili bagnàa suteu scundas

via via

                                                              

vistis cun voeuia da liberas

cun la speransa che foeura da lì l'é mei

voeuia d'un ventu libar c'al ta canta i cansun d'ul desideri

via via

baoeul scur

 

                                                                   

    

la sira la va a finìi in un baoeul scur pìin da voeui

nà noci sensa Luna e sensa finestar

lunga e sensa fìin

a un certu puntu riva 'l ventu cun i storì

i nos storìi

bei e bruti                         

donn suta 'l purtun

                                                               

suta 'l purtun

i sir d'està

i Donn cul so cadrighin e i gugi pà laurà

ciciarean fra da lur

sensa lur 'l mundu l'é dientà pusé puaretu

manca 'l parlà quietu di Donn

han fa i abitanti e i hann tirà su

due ca sì Donn dul purtun

i Donn fan di oltar robi

anca nò da Donn

in dua cà sì    Regiù

brascc verti

 

                                                                      

brascc verti a stringi l'ultam tocu da la storia

'nà storia finì

'nà bela storia finì mal ma bela

tuti i storìi in bei

la storia semm noeun

sensa voeuré scrium la storia da la vita

voeuna lé lunga

voeuna lé coeurta

e tuci ghan 'l stess final

 

un dìi gris

                                                                      

un dìi gris ca 'l pasa pùu

lungu me la famm

pena c'al pasa 'l ta par bell e ta dispias cà l'è finìi

vivu al tempu pasàa e la ma par nò 'na bella roba

'n dun cantun da la me menti ghé un quicoss ca riesi nò a ciapà

la manera cà ma fasaria vivi i giurnàa gris in manera culuràa

ma sa ma guardu indrée vedu tutt gris

un foeui biancu

                                                                   

un foeui biancu tutt mé

da impinìi ma voeuru

'na pagina da vita da fermà

mei che 'na foto

rasunamenti da fàa o da fàa nò

in libertà

parol ca vegnaan ciapà da un cuivunn e duperàa

in libertà

parol culuràa o in biancu e negar ma sa voeur

in libertà

un'evasiun 'na fantasia

'nà tana o 'na reggia ma te voeuri

in un foeui biancu ga sta tucoss

la finestrela

                                                                        

da la finestrela cul vedar fiss su a voltu

sa videa vignì giò

di filapar da Née

da la stràa giò in bass sa sintia la genti pasà sensa fa rumur

ul me fioeu vignù in cà 'l sbati i scarpi pìin da Née

ul tempu da tirai foeura e 'l vervi la porta

ma la và Pàa

ma rigordu no quantu tempi sun chì

ma par chi 'n dù Natai

o tri

meti giò un po' da pan pai Pasariti

va ben Pàa

tempi diversi

                                                        

g'hé un tempu in ogni tempu

un inisi e 'nà fin

un tempu eternu e un tempu finì

ul nos tempu 'l svanis cume un fiàa

un granelin da sabia in dul desertu

ul mé capìi el svanis in dun reful d'aria

mì

e qui mei da mì

som menu da zeru

 

paté de pulaster

                                               

                                                             

fa a tuchiti el pulaster e fal cos cun buter selar e carotula, fa coeus pian pian sensa culural fina a che sa distaca i oss. Pasal do volt al tritatutt e meti den 4 cugiàa da panna. Pesal e stess pes ul buter muntàa. Mischal ben ben e metel in una terina, quetal da gelatina e metel in frigo.

Da  consumare  con  una  bottiglia  a testa  di Barengo  bianco  di  due  anni.

 

una finestra da guardàa foeura

                                                                          

cercu 'na stansa cun di finestar cà guardan foeura

su un'altra vita ca la sia nò la mia

da pudé vivi insema

e inveci ghù paura

e da finestar da vervi a 'n vedu minga

sum destinàa a murì sensa vervi 'na finestra

un tuchelin de vita

 

                                                                        

quandu ul tramuntu al perdi culur e 'l dìi 'l moeur

e te giri un atim i ogi e tel vedi pù

un atim lé mortu e 'l ghé pù

un tuchelin de vita l'é 'n dai

ma perdas nò da curagiu

vivi 'l mumentu parchè lè l'unicu modu da vivi

e lé già ier

pan di mort

400 gr.  de  zucher 50  gr. da  cacau, 50  gr.  da  ciuculatu,  un  bicier  da  vin  biancu, un  cugiàa  da  mel, 300  gr.  da  farina  bianca, 300  gr.  da  mandurl  trià  gross, 200  da  cedro  pinoli e naranz  candì,  10  gr.  da  spezi  mist in pulver.
impastà   ben  ben  tutu  e  furmà  di  pagnutei  ovai  lunghi,  fai  cous  un'ura
in  furnu.
spulverai  da  zucher  a  vel  anmò  cald.


Una  butiglia  da  moscato  d'Asti per  vun la  va  ben.  In ricordu.

anima persa

 

                                                                

scultu silensi strani

silensi ca ta senti cun la pell

da robi dì nò

robi pesanti ca sa dis mai

un silensi minacius pìin da rumur da la
noci

un Can ca buia

ul moeuas dul legnn e i so rumur da asestamentu

i Gati ca fan i so lamenti sessuai un para da curti pusé in là

e al ta và denn cume un rumur fastidius

a l'é l'anima ca la vusa

la mé anima

ca quann ca la moeur la svanis cume un petu

te se denn da mi ma ma cunusum nò