strachesa cuntenta

quìi sir da fioeu

da strachesa cuntenta

mangiandu la bona minestra

sitàa in curti pugiàa al mur

casciandu via 'l Gatu cun l'altra man

i me tempi bei luntan

ma visin 'n dul ricordu

luna bianca

cun che la Luna chi sa poeu legi 'ul giurnal

i fil da pianti da pomm fen umbràa

la Baraca bianca davanti cun un scur enormi da drèe c'al fea ul buscu

un buscu lungu fina al paes

negaar

e la stràa bianca da Luna

Verità inaferabil

chel vivi chi lé 'na lota infinìi

in cerca d'una rasun

che quan la sa intuiss la prucura un'emusiun

ca la svaniss cul primm rasunament

ma 'l ta lasa sicur ca ghè 'na verità

inaferabil ma la ghè

al sicur fra i lur rasunament e i mila dubi

ma so ca la ghé

mila foeui bianchi da impinìi

mila rasunament da fa e disfà

cercandu 'na veriità inaferabil

sogn svanìi

i sognn in sensa cunsistensa

te da ciapài al volo inscì ma vegnan

qui bei sa ciaman sogn

qui bruti incubi

ma vegnan vegnan

noci da durmì stracu

noci sensa fin

noci liger me ìn fiàa

un sogn 'l ta cambia tucoss

noci da Ustu

noci stelàa

noci da Ustu

noci fresca

ma incantu guardandu ul ciel e i stell par ca sa moeuan

nuandu 'n dul scur

dasua da casina i Piunn fean fru-fru

la famm

la rasun la dis da no ma mi ma sentu un supravisù

a 'na guera lunga e dura

la famm l'é nò veghi voeuia da mangià

la famm l'é un'altra roba chi l'à pruaa 'l sa ma l'é

metes a dieta

se te pruàa la famm te sa meti nò a dieta

l'é na famm antica ca la pasa nò cul mangià

qui ca fa la dieta in nasù in tempu da Pas

Verita inaferabil

chel vivi chi lé 'na lota infinìi

in cerca d'una rasun

che quan la sa intuiss la prucura un'emusiun

ca la svaniss cul primm rasunament

ma 'l ta lasa sicur ca ghè 'na verità

inaferabil ma la ghè

al sicur fra i lur rasunament e i mila dubi

ma so ca la ghé

mila foeui bianchi da impinìi

mila rasunament da fa e disfà

cercandu 'na veriità inaferabil

Prucesiun

i fiur schiscià su la stràa di prucesiun

cun i tusann cui calsett bianchi còrti

gambi liscc sensa pel

parti d'una prumesa

cunsumàa in un atim

gà resta ul prufum di Roes schiscià su la stràa

e quel di candel de la Figlie di Maria

e di mucouloti russ di donnn ca vignia par ultam a siràa la Prucesiun

Luna bagnàa

'na Luna bagnàa la lasa di fil d'argentu 'n da l'acqua ca curr

la lus sul punti la giuga in muimenti cà saltan su l'acqua

ul scur suta 'l punti 'l par pusé negar 'n dua ga va denn tuta l'acqua

i lus di machin cà pasa sul punti a rumpan la scena

cume un sognn ca sa ferma

La famm

la rasun la dis da no ma mi ma sentu un supravisù

a 'na guera lunga e dura

la famm l'é nò veghi voeuia da mangià

la famm l'é un'altra roba chi l'à pruaa 'l sa ma l'é

metes a dieta

se te pruàa la famm te sa meti nò a dieta

l'é na famm antica ca la pasa nò cul mangià

qui ca fa la dieta in nasù in tempu da Pas

un mundu scundu

Cui sir da coldu

cui rundin ca fa festa

vulandu bas in cuntràa

vusandu i so stridul versi

e nun fioeu ca giugum insema ai tusann

ul mundu l'ea anmò scundù par nun fioeu

i tusann sa cumportan cume se inveci

a sean tucoss

Ul camin

ricurdandu l'udur di castegnn te se vedi in tanti in gir al camin

parlandu da nien

'na banca da donn vigi

e v'una da tusann sitàa in brascia a dòo a dòo

i fioeu setàa in tera guardean i tusann

i guss sa butean sul foeugu

cul tuscan in buca i Regiù guardean da padrun

vures ben

cume certi vistìi

a un certu puntu te se acorgi che in vignù larghi o strenci

anca ul vures ben al vegnn larghu o strenciu

però sa manca ul vure manca tucoss

ca vistiss ul ben lé ul vurée

culurà i dìi gris

                                                                                     

pà fa bela la vita

ga voeur culurà i dì gris

prufumà i erbi e l'udur di tusann

vervi la finestra di ricordi ca sa spintunan d'adré da mi

'na finestra iluminà ca sa spegia 'n dul canal

la prucesiun cui tusann vistì da biancu

corgias ca le dumeniga e 'ndà inansi a durmì

legi ul giurnal 'n matina al taulin in piasa

l'udur da l'acqua 'n dul canal

partì 'na matina in barca da par mì

rimpianti

Rimpianti

a vivum

da ricordi cunfus

da rimpianti amar

da donn cunusu no

da vergognn scundùu

a vivum

luna bagnàa

                                                                                             

'na Luna bagnàa la lasa di fil d'argentu 'n da l'acqua ca curr

la lus sul punti la giuga in muimenti cà saltan su l'acqua

ul scur suta 'l punti 'l par pusé negar 'n dua ga va denn tuta l'acqua

i lus di machin cà pasa sul punti a rumpan la scena

cume un sognn ca sa ferma

sira ferma

                                                                                                    

A ghe un ura a la fin da la giurna

che l'aria la sa ferma

i rundin van avanti e indree par riga ul ciel

la barca bandunà  su l'acqua morta

par ca la sa riposa

'l spuntun bagnaa al ga i guti ca curan giò

una Sciura bloeu la sa pogia su la cima de la barca

'l co de la Bisa el riga l'acqua dul Marinun

doeu Barbi vegnan a guardà suta la barca.

Ma 'l dura pocu.

dimi Pà

                                                                                                  

dimi Pà

dimi i stori dul to tempu

coeuntumi

parlam di cavai bianchi e murei

da la vaca ca la ta dea ul laci

ca la ta scaldea d'invernu

dimi Pa da la vigna

dul magengu

dul furmentu

dul maagun

dul pan gialdu

dul bragioeu

ma l'ea ul to mundu ?

dimi Pa

luna balerina

                                                                                   

                                                                                 

stasira la Luna la sa rifleti in dul canal

la galegia su l'acqua ca curr

la par ligà

la va giò no cun l'acqua

la scapa mé 'n fantasma

la giuga cui càa rifletendu dumàa i tici

cul Cucù cal disea ogni tan la so canta

'na Luna balerina

ragurdevas

                                                                                               

Ul ciel scur ma pesa su i spall

ma deu andà

da par mi l'é dura ma deu

i fioeu ca vegnarà

magari da ciel scur a'n vedarann minga

ga pasu  a loeur la speransa

ragurdevas fioeu ragurdevas

la finestrela

                                                                                   

da la finestrela cul vedar fiss su a voltu

sa videa vignì giò

di filapar da Née

da la stràa giò in bass sa sintia la genti pasà sensa fa rumur

ul me fioeu vignù in cà 'l sbati i scarpi pìin da Née

ul tempu da tirai foeura e 'l vervi la porta

ma la và Pàa

ma rigordu no quantu tempi sun chì

ma par chi 'n dù Natai

o tri

meti giò un po' da pan pai Pasariti

va ben Pàa

grazie Samuela

Window  10  mi aveva  mangiato  " Taribal ", Samuela me lo  ha  dato  indietro.  Grazie  Samu.

                                                                                      

Via via
vistis  cun  voeuia  da  liberas
cun la  speransa  che  foeura da  lì  lé  mei
voeuia  d'un  ventu  libar  c'al  ta  canta  i  cansun  dul  desideri
via   via

ul fil d'erba

                                                                

ul fil d'erba lé la rapresentasiu dun mundu

al fa i pràa

al distrugi ul cimentu

l'infila i guti da rusàa

lé amis di farfai e tuti i inseti ca sa cunus

sa ghe l'acqua al bee se no 'l fa sensa

quan cà 'l moeur 'l va in un udurus fenil

vurariì ves un fil d'erba

in gir al foeugu

 

                                                                

sir d'invernu

in gir al foeugu alegar dul camin

quatar castegnn da cumpagnia

guardandu i gambi di tusann

seu nò se sugnà i tusann o gustà la cumpagnia

gà vu drée al mumentu e vivu tucoss gulusament

castegnn

foeugu

tusann

un mumentu inscì al turnaràa poeu

prufum da sognn

 

                                                         

scrìì 'l diventa la vus dul coeur

ca fra ti e ti 'l rasuna

prufum da sognn cà da vignì

vita grama

Aceta la vita inscì ma la vegnn

un po' da dulur

un cicin da cuntentesa

pensa no

pensà lé stupid

ciapala ma la vegnn

ALDA MERINI

                                                                        

hoo...Alda
la  migliur  puesia  cò  mai  cunusu
brusàa  da  la  voeuia  da  vess  amisa  cul  Signur
parchè Alda
parchè

turtei de carneval

mett  a  moeui  'na  brancadina  da  ugheta  in acqua.
100 g.  da  farina  bianca,  100 g.  da  farina  da  ris,  un   quartu  da  lat,  cun un  cugià  da legn laura  ben   ben, mett  un  cicin da  Sa la  scorsa  d'un Limun  gratt. e, vun a  la  volta  tri  Oeu  e  l'ugheta  strisàa.
Fa  frigi   in abundanti  oli  da  arachidi, un cugiàa par  volta.
La  farina  da  ris i  ha  rendi menu impregnàa  da  oli  da  fritura.


Una  butiglia  da Muscà  da  Ghem  a  testa  e  tuci in  cuntent

Vitoriu cecilia

                                                                      

'n da la me cuntra ga stea Vitoriu Cecilia

al fea di robi ca nisun l'ea bun da fa

l'ea magar e piscinin sensa aparensa

el giughea da centravanti ma su i culpi da testa

anca se la curea vun voltu du metar

al rivea lu par la so agilita e furbisia

a cur la batea nisun par la so agilità

al fea un numer da circu

'ndea indre cun la bicicleta sataa 'su manubriu

sul parapetu dul canal ca l'ea cunvesu

anca d'invernu cuan che ul canal 'lea suciu.

vun ca 'l tas

                                                                 

un Omm ca parla pocu

vun ca 'l tas te a veghi paura

sa 'l parla lu parlu anca mì

ben o mal somm sul stess livel

ma cun cun ca 'l parla nò

su nò come fàa

un tipu periculus

                                                                       

te se d'acordu

te se san da menti

te se nò d'acordu

te se periculus lé mei ligati subitu

te vegnaré giudicàa da genti studiaa

ul mundu di Farfai

                                                                        

guarda i Farfai ma vulan liger sui Fiur a primavera

in vignì foeura da l'invernu insema a i Fiur

da un mundu special

ul mundu di Farfai ca cultivan i Fiur

Il mio Asilo

parson ca cunta

                                                          

Cunusu personn ca videi poeù sentariu nò la mancansa

altar inveci

cà ogni atim la saria un'eternità

ma in pochi

i primm un mar da muschiti su la damigiana

i altar sa cuntan su 'na man munca

vun o dù

ul me dialetu

Ul nos dialetu

dur e scur

ma tantu bel

te podi dì tucoss

dai robi bei a cui bruti

dai sentimenti ai bastemm

'na dichiarasun d'amur a un ufes

'n du 'nol paes tal senti subit

l'é vun dul me paes

ù persu 'l Signur

                                                                    

                                                              

un  tempu vun quan ca 'l muria 'l sea in dua 'l duea 'ndà

a la destra dul Signur

ma 'l Signur 'l troeu pù

l'é vignù scur

sum vivu ma ma par da vess mortu

dì da Lui

 

                                                               

                                                                    

i dìi da Lui interminabil

cul coldu  sensa fin

ca ta portan a la noci pesanti

da scuntà me nà pena

Utubar

                                                                   

un slargu da celesti un po' da gris

ul gialdu dul So su i fraschi

smagi da russ sul santé

la matina da Utubar la va inansi cul so spetacul

vigilia da Natal

                                                                        

vess  in piasa  e   sintis  cume  a  càa tua  sul  divan
la   genti  foeura  da  la  Gesa  a  ciciarà
la  Camana  in piasa
ta  par  da  vess  in  un  sogn
genti  cà  vedu   mai   cuntentu  da  videla
la  Camana
la genti in  gir  a  guardà   cuntenta

ul santé da la vita

 

                                                                 

ul santé al va

pà savé 'n dua 'l porta ga voeur fal

santé da tera pulverusa

i pass la sulevan

l'erba da parti l'é un verdu spurcu

i Luserti curan in du l'erba

denn in du 'n buscu da Rubiti sensa So pulvar ga né pù

da trunchi taiàa i lam di fungi paran i ram dun sogn

un Grill 'l sa cunfundi fra i ram di pianti pusé volti

la straela la vegnn fregia

lé vignù scur

sui ram di usìi gross ma guardan pasà

torna indrèe

scapa

ma ga voeur andàa inansi fina a la fin

Vita da uperari

invernu  estàa  sveglia  a  ses  ur
te  a 'ndà  a  timbràa  te  se  un lauradur
mesdì  un  bucun  da  strangurun
e anmò  indrée  par pochi  danée


urmai  ridott  a  Robot
tuta  irunia
vignì  a  sgunfiam  ul  còo
"che  il lavoroo  è  poesia"
ma  và  a  cagàa  che  se  'l  lauràa
fuss  stàa "ros  e  fiur"
lauràa  laurea  qui  sciur
ti  ta  lasean lì  a  guardàa



Parole  e  musica.

la curti la ghé poeu

                                                                             

Prima l'ea la Lina

morta la Lina ga ciapà in man la diresiun da la curti la Giuanina

che cun la so facia bisinfia

l'ea quela giusta pa cumandà

la circhea ul postu da lauàa ai fiuroti in età

sui matrimoni la tratea i doti e i pruprietà

i primm nascit i primm malatii i prim morti l'ea li a urganisà

la curti l'ea ul so mundu la sa pudea no fermà

un di gu dii giuanina cume in fa i donn in due go da andà

te a scupril da par ti o te fe la murusa o te cunusi vuna che ga pias a fa 'ndà

poeu ghe riaa la Republica cumandean tuci ma ghea pu la giuanina a cumandà

dess ca som vegiu

 

                                                                             

a la me età pretendu robi cò mai voeuru

daghi dul ti a tuci

dal Presidenti da la Republica al barbun da la Central

pretendi ul rispetu che mi a gò par tuci

ma cunsula savé che i Rundiin vulan anmò e anca i Farfai

l'erba là cress verda

i fioeuriti i fan festa e mi

forti da la me perdù giuinesa

vularò via

sù sù sù

pulaster in fricassea N. 2

mett in dul padalotu 25 gr. de buter e quan l'è drèe scioglias buta un cugiàa da farina

ruga ben ben e quan là ciapà un bel culur niscioeula versa quasi mes liter d'acqua e un masetu fai da strisc da scigula carotula selar presemul e basili quan l'acqua la bui i tochi da pulaster 25 gr da buter sa e pear biancu, queta cun un bel querciu e fa coeus 45 mn. meti den di fung da stagiun o di porcini sichi e porta a cutura smorsa ìl foeugu, buta  via  ul masetu da  erbi, e meti den rugandu du ross d'oeu sbatù cul sugu da limun.

Una butiglia a testa da Sizzano da tri ann forsi l'è sèe. Forsi.

 

ogi da madona

 

                                                                     

la stea a S.Rocu

da quan ca l'ea piscinina l'ea bela

quan ca 'ndeu in dul Dutur ma capitàa da videla

drisa un fus cul coll lungu

mi g'eu un para d'ann in pù

ù cuminciàa a dighi ciau e le la disea ciau

la Dumeniga la 'ndea a Messa cun so mama

ma da la parti di donn la parti mansina da la Gesa

e i maschi pudean nò 'ndà

finì Messa 'ndeum foeura insema lur danansi e mì dadré

vignù Magg quell'ann lì l'ea dientà 'na signurina

la cumpagneu a càa e ma firmeu a parlàa suta càa

e sempar pù ma rimanea in menti

sculpìi den da mi

a ian i ogi

ogi da Madona