IL CIRCOLO

                                                                                                        

In tuti i paes gh'ea i Circual

in tuti i paes ul Circual l'ea ul centru da la cumunità

l'aria pesanti

pena dentu

pina da fumm

udur da grapa

da marsala

da vin

sa usea duma i tasi d'un cuartu esatu e la duea ves pina fina a l'orlu

cuel saur pesanti dul vin che cui so gradi

'l fea galegià ul cervel in du'n mar d'alcul

ca 'l lasea foeura tuti i robi bruti

'n dul bruscu dul vin e i sigareti fuma

ogni vun 'l truea la so dimensiun

tuti i rogn dismentegaa

i amicisi rinfursa

L'ultam ca rivea sa firmea al bancu a toeu 'l mes litar e un bicier voeui

e 'l dea a ciapà postu al so taul

cuan l'ea invernu

al sabu e la dumeniga

ga rivea 'l furatu

al col 'na cubia da firuni gross

e liga in vita una masa da fir lunghi 'na spana e 'l sachetu di numar c'al fea balà

centu franchi al tir

sa l'ea menu da nuanta cun tri numar

sa vincea 'na fira piscinina

sul bancu

su la destra

gea i Cannuncin e i Viulin

gh'ea tri mundi

Ul laua

ul Circual

e la famiia

u mai vistu risia da metas ados i man

gh'ea rispetu pa' la persona

l'ea un mundu migliur

'na spece da zona 'ndua ghea di valur no in discusiun

cuan l'ea festa cui un po' fin

biean ul grigioverde

ma i omm la solita tasa

cuan sa giugea no a ciamà ul du

in pee visin al bancu

sa fea i gir

sa sa sea in cinq

a ian cinq tasi ognun

poeu

pian pian sean iscriti tuci al'AVIS

e ogni tri mes a ian cuntrula

e i esam dul sangui

i a frenea un po' in dul bee

e alura a ca

cuan mangiean beean la Coca Cola

i gir al Circual restean fermi

cuma la Mesa in latin

in cuel' aria

respiraa tanci voeulti

cunn tanci udur

nanca vun bun

gh'ea cundensaa ul mundu da cui ann li

da robi bruti ma sincer

giurnaa lunghi e dur

festi sensa culur

impinii da laua