La straa la finia a la funtanela,
ul scarigu da la SACPA,una rungia d'aqua marun, che la spusiva
nò pocu, la girea in gir a la funtanela par andà a scarigas
su la tera dul Campasc. I zanzar, misurà a
metar, a ian da recurd mundial.
L'ea quel sa videa a guardà giò
da la me finestra in dul 1968.
Una straela la 'ndea dua ades a ghe
la CHIERICHETTI, ean tucc vign, su la straela a ghea di
urtasei ricintaa che nanca sa videan scundu tra ul maagun, in
di urtasein a ghea un po' da tutu: anguri, melun e fiur p'al
cimiteri. A sta 'tenti sa videa anca di picul nimai, visin a
la rungeta i Ran, sa na videa tanci 'n la stagiun, e do Bis
marun da sua e verdi sutu, ca vivean da diu in tutu ch'el
ben di Diu. Ga feu nisuna impresiun ai do Bis nanca
scapean quand 'ndeu a truai e sa fean vidé tranquillament, ia
ciameu ONA e INA, perchè vuna l' ea pusè grosa.
L'ea un picul paradis.
In la rungeta gh'ea sempar un po'
d'aqua,ogni tant l'ea piena,ogni tant l'ea basa, un po d'aqua la
ghea sempar e gh'ea i Girin e i Sanguisughi, ca ian cume 'n
sigareta e quan mangiean sa gunfiean un spropositu, sa usean
par chi ghea 'l sangui gross. Sa ta 'ndei den sa tachean ai
gambi. In su l'aqua di insett ca scatean avanti e indree in su
l'aqua. I Bis ga nean da mangià. 'n da un ortasel una pianta
da Zizurliti che pasandu sa catean, i sean da pocu ma gh'ea ul
gustu dul ricordu e intantu ca mangeu ogni una l'ea un ricordu.
'n du un 'urtasel fina un cespui da Runcas.
I iean bei da vidé i urtasei. A fa
la straela e 'nda a trua i Bis ta purtea via un para d'ur, E
seu cuntentu,crideu che l'ea l'amicisia cun i Bis , un po strana,
ma inveci nò, l'ea ul mundu ca l'ea bel, 'l ta impinia ul
coeur.
Mi stò sempar là in 'da stesa
finestra ma vedu pù i pra e i urtasei, ghe pù i Zizurliti ma
i ca e i Kiwi ca in no istess e sa po nò rubai.
Ch'el picul mundu al se sarà
spustà pusè in la, forsi 'l ghé 'n mò, ma mi ga sun nò,
ul mundu di Bis al ghe pù. Un mundu l'è finì.
Nessun commento:
Posta un commento