Mundu ruba

Guardandu 'n di mé finestar versu Cunà sa videa 'na fia da praa ca rivea fina al Buscu due finia 'l fussà e 'n dua ghea ul Riservin, un postu 'ndua riparas par i Caciadur,un bel lucal grandi e un camin, buscu ca sa videa in luntanansa prima di ca da Cunà. G'hea tanci stradei c'andean da chi e da là, cun di ortasei scundù.

La straa la finia a la funtanéla, ul scarigu da la SACPA,una rungia d'aqua marun, che la spusiva nò pocu, la girea in gir a la funtanela par andà a scarigas su la tera dul Campasc. I zanzar, misurà a metar, a ian da recurd mundial.

L'ea quel ca sa videa a guardà giò da la me finestra in dul 1968.

Una straela la 'ndea dua ades a ghé la CHIERICHETTI, ean tucc vign, su la straéla a ghea di urtasei ricintaa che nanca sa videan scundű tra ul maagun, in di urtasein a ghea un po' da tutu: angurii, melun e fiur p'al cimiteri. A sta 'tenti sa videa anca di picul nimai, visin a la rungeta i Ran, sa na videa tanci 'n la stagiun, e do Bis marun da sua e verdi sutu, ca vivean da diu in tutu ch'el ben di Diu. Ga feu nisuna impresiun ai do Bis nanca scapean quand 'ndeu a truai e sa fean vidé tranquillament, ia ciameu ONA e INA, perché vuna l' ea pusè grosa.

L'ea un picul paradis.

In la rungéta gh'ea sèmpar un po' d'aqua,ogni tant l'ea piena,ogni tant l'ea basa, un po d'aqua la ghea sempar e gh'ea i Girin e i Sanguisughi, ca ian cumé 'n sigareta e quan mangiean sa gunfiean un spropositu, sa usean par chi ghea 'l sangui gross. Sa ta 'ndei den sa tachean ai gambi. In su l'aqua di insett ca scatean avanti e indrée in su l'aqua. I Bis ga nean da mangià. 'n da un ortasel una pianta da Zizurliti che pasandu sa catéan, i séan da pocu ma gh'ea ul gustu dul ricordu e intantu ca mangeu ogni una l'ea un ricordu. 'n du un 'urtasel fina un cespui da Runcas.

I ean bei da vidé i urtasei. A fa la straela e 'nda a trua i Bis ta purtea via un para d'ur, E seu cuntentu,crideu che l'ea l'amicisia cun i Bis , un po strana, ma inveci nò, l'ea ul mundu ca l'ea bel, 'l ta impinia ul coeur.

Mi stò sempar là in 'da stesa finestra ma vedu pù i pra e i urtasei, ghe pù i Zizurliti ma i ca e i Kiwi ca in no istess e sa po nò rubai.

Ch'el picul mundu al se sarà spustà pusé in la, forsi 'l ghé 'n mò, ma mi ga sun nò, ul mundu di Bis al ghe pù. Un mundu l'é finì.